Tbilisi, 8 aprel, AZƏRTAC
Gözlənilmədən yağan güclü qar, külək və qasırğa Gürcüstanda ciddi problemlər yaradıb.
Gürcüstan mətbuatının məlumatına görə, güclü qar nəticəsində Gürcüstandan Rusiyaya gedən yolda problemlər yaranıb. İki gün öncə yol bütünlüklə bağlansa da, bu gün avtomobillərin hərəkətinə birtərəfli qaydada icazə verilib. Gürcüstanın müvafiq dövlət strukturları yolun açılması üçün təxirəsalınmaz tədbirlər görürlər.
Bu arada qasırğa Kutaisi və Batumidə, eləcə də digər yaşayış bölgələrində ciddi fəsadlar törədib. Güclü külək ağacları kökündən qoparıb, evlərin damını uçurub. Avtomobillərə, eləcə də bir sıra ictimai–iaşə obyektinə ciddi ziyan dəyib.
Bölgənin bəzi ərazilərinə elektrik enerjisinin və içməli suyun verilməsində fasilələr yaranıb. Hökumət təbii fəlakətdən ziyan çəkmiş insanlara yardım göstəriləcəyini bildirib.
Dağıntılara məruz qalmış şəhərlərdə təcili tədbirlər görülür.
Xətayi Əzizov
AZƏRTAC-ın xüsusi müxbiri
Tbilisi