Bakı, 3 aprel, AZƏRTAC 
Dövlət Sərhəd Xidməti (DSX) tərəfindən 2015-ci ilin mart ayı ərzində dövlət sərhədinin etibarlı mühafizəsi istiqamətində məqsədyönlü tədbirlər həyata keçirilib, qaçaqmalçılığa, qeyri-leqal miqrasiyaya, narkotik vasitələrin qeyri-qanuni dövriyyəsinə qarşı mübarizə uğurla davam etdirilib.
DSX-nin mətbuat mərkəzindən AZƏRTAC-a bildiriblər ki, ay ərzində dövlət sərhədini pozduqları üçün 28 halda 34 nəfər saxlanılıb. Onların 24-ü Azərbaycan, 5-i Özbəkistan, 2-si Türkiyə, hər ölkədən bir nəfər olmaqla İran, Gürcüstan və Litva vətəndaşları olub.
Sərhəd rejim qaydalarını pozarkən yaşıl sərhəddə 9 halda 18, Xəzər dənizində 7 halda 11 nəfər saxlanılaraq barələrində müvafiq tədbir görülüb.
Cinayətkarlığa qarşı mübarizə tədbirləri nəticəsində Azərbaycan Respublikasının hüquq mühafizə orqanları tərəfindən axtarışda olan 267 nəfər aşkarlanaraq aidiyyəti orqanlara təhvil verilib.
Narkotik vasitələrin qeyri-qanuni dövriyyəsinə qarşı mübarizə tədbirləri nəticəsində 23 halda 10 kiloqram 332,7 qram narkotik maddənin dövlət sərhədindən keçirilməsinin qarşısı alınıb.
Qaçaqmalçılıq fəaliyyəti ilə məşğul olan bir cinayətkar dəstə aşkarlanıb, dəstə üzvlərindən bir nəfəri cinayət məsuliyyətinə cəlb olunub, digərləri barədə əməliyyat-axtarış və istintaq tədbirləri davam etdirilir. Qaçaqmalçılığa qarşı mübarizə çərçivəsində həyata keçirilmiş tədbirlər nəticəsində 68 halda ümumi dəyəri təqribən 712 min manat olan qaçaqmalın, o cümlədən 1 pnevmatik tapança, 12 millimetrlik 24 giliz, 15 kiloqram barıt, 3 beşbarmaq, 1 bıçaq, 1 gözyaşardıcı balon, 337 zinət əşyası, 8486 qutu siqaret, 91 mobil telefon, avtomobillər üçün 19 adda 28 ədəd ehtiyat hissələri, 3500 metr balıq toru, 1 kiloqram kalium-permanqanat preparatı, 3,5 kiloqram qırmızı kürü, müxtəlif ərzaq və sənaye malları saxlanılıb.
Dövlət sərhədlərimizin etibarlı mühafizəsinin təşkili istiqamətində tədbirlər davam etdirilir.