Bakı, 2 aprel, AZƏRTAC
Aprelin 2-də Strasburq Universitetinin prezidenti Alen Beretzin rəhbərlik etdiyi nümayəndə heyəti Azərbaycan Dövlət İqtisad Universitetində (ADİU) olub.
ADİU-dan AZƏRTAC-a bildiriblər ki, bu ali məktəbin rektoru, professor Ədalət Muradov qonaqlara universitet haqqında ətraflı məlumat verib.
Görüşdə birgə əməkdaşlıq imkanları, ikili diplom və müəllim-tələbə mübadiləsi, Fransa universitetləri ilə elmi-tədqiqat sahəsində qarşılıqlı əlaqələrin genişləndirilməsi barədə fikir mübadiləsi aparılıb. Həmçinin, ADİU və Fransa universitetlərində dərc olunan elmi jurnallarda hər iki tərəfdən olan alimlərin məqalələrinin dərc edilməsinin mümkünlüyü müzakirə olunub.
Ə.Muradov Fransa ali təhsil ocaqlarında menecment ixtisasının daha yüksək səviyyədə tədris olunduğunu bildirib, gələcəkdə ADİU-da Fransa Azərbaycan menecment məktəbinin yaradılmasını təklif edib.
A.Beretz iqtisadiyyat və menecment sahəsində araşdırmaların mühümlüyünü diqqətə çatdırıb, universitetlər arasında tədqiqatçı mübadiləsinin vacibliyini vurğulayıb.
Sonra Fransanın Ruen Universiteti və Reyms Şampan-Arden Universiteti ilə ADİU arasında anlaşma memorandumu imzalanıb. Hər iki sənəddə universitetlər arasında tələbə-müəllim mübadiləsi və birgə təhsil proqramlarının təşkili nəzərdə tutulur.