Bakı, 2 aprel, AZƏRTAC
Azərbaycan Milli Elmlər Akademiyası Milli Azərbaycan Tarix Muzeyinin etnoqrafiya elmi-fond şöbəsi tərəfindən ekspozisiyanın tikmə məmulatları nümayiş olunan vitrini yenidən qurulub və təkmilləşdirilib.
Muzeydən AZƏRTAC-a bildiriblər ki, yeni qurulan vitrində Azərbaycanın ənənəvi tikmə sənəti növlərinə aid təkəlduz, güləbətin, muncuq, pilək, qondarma üsulları ilə hazırlanmış məmulatlar, həmçinin, bədii tikmə növləri ilə bəzədilmiş geyimlər də yer alıb. Vitrində yerləşdirilən 24 saxlama vahidi eksponat Azərbaycanın xalq məişəti ənənələrini özündə əks etdirir. Vitrində olduqca böyük maraq doğuran, qondarma üsulu ilə ərsəyə gətirilən, “Leyli və Məcnun” operasından səhnə təsvir edilmiş eksponat tikmə sənəti sahəsində yenilik olub, təbii ceyran dərisi, insan saçı və ipək parçalardan istifadə edilməklə hazırlanıb. Tikmə görkəmli Azərbaycan dramaturqu Ə.Haqverdiyev tərəfindən 1908-ci il yanvarın 12-də tamaşaya qoyulan "Leyli və Məcnun" operasının yaratdığı təəssürat əsasında Şuşa sakini tərəfindən tikilib. Əsər etnoqrafiya fondunun nadir eksponatları sırasında yer alır.