Bakı, 2 aprel, AZƏRTAC
“Bank Technique” yeni məhsulu olan “Sığortalı+” depozitini təqdim edir.
Bankdan AZƏRTAC-a bildiriblər ki, bankın sığortalı depozit növlərinə aid edilən bu yeni əmanət növü mümkün valyuta risklərinin qarşılanması ilə seçilir. Bank əmanətçilərə manat vəsaitlərini və faizlərini müddətin sonunda istər yerləşdirildiyi kimi manatda, istər isə ABŞ dollarında, yerləşdirmə gününün məzənnəsi ilə götürmək imkanını yaradır. Bu zaman bütün mümkün valyuta risklərini bank üzərinə götürür, müştəri isə bütün məzənnə dəyişikliklərindən sığortalanır və dollarla yatırılmış əmanətlə müqayisədə daha böyük gəlir əldə edir.
“Yeni məhsulumuz müştərilərimizin razılığına və arxayınlığına yönəlib. Hər bir əmanətçi müddətin sonunda vəsaitlərini və gəlirini manat və ya yerləşdirdiyi günün məzənnəsi ilə ABŞ dollarında götürə biləcək”, - deyə bankın baş direktoru Kamran Axundov vurğulayıb.
Qeyd edək ki, “Sığortalı+” depoziti Azərbaycan Əmanətlərin Sığortalanması Fondu tərəfindən sığortalanır. Əmanət müddəti 1 il olmaqla, minimal məbləğ 5 min manat, illik faiz dərəcəsi 8 faiz təşkil edir. Üçüncü şəxsin xeyrinə də açıla biləcək depozit üzrə vəsaitlərini yerləşdirən müştərilərə “Bank Technique”in plastik kartı və səyahət sığortası paketi hədiyyə olunur.