Ötən il həyat yoldaşına konsert verən müğənni Nadir Qafarzadə evliliklərinin 23 illiyi münasibəti ilə xanımına sürpriz hazırlayıb
Milli.Az-a açıqlama verən N.Qafarzadə deyib ki, o, xanımının şərəfinə "Sevincim" adlı bəstəni ifa edib: “Bu sadəcə bir sevgi etirafıdır. Təxminən 3-4 dəqiqəlik mahnıda keçdiyimiz həyat yoluna nəzər salmışam. İndi bir çoxları deyəcəklər ki, Nadir həyat yoldaşı ilə gündəmə gəlir. Bu heç də belə deyil. Bu sadəcə mənim xanımıma verdiyim sevgi, hörmət və dəyərdir. Kim necə fikirləşir-fikirləşsin. Düşünürəm ki, hər bir bəy öz xanımına dəyər verməlidir.

Mən də müğənniyəm. Öz sevgi etirafımı ona musiqilərimlə bildirirəm. Heç kimsə düşünməsin ki, bu, gündəm, reklam üçündür. Mənim reklama ehtiyacım yoxdur. Sadəcə 23 illik həyat yoldaşıma, uşaqlarımın anasına təqdim edəcəyim növbəti hədiyyədir. Mahnının sözlərində də bir məna var. “Sevincim” adlı bəstənin sözləri Altay Yaşara, musiqisi isə Fərid Kərimliyə məxsusdur. Düşünürəm ki, ifa etdiyim bu mahnının mənim həyatımda ayrı yeri olacaq".

Qeyd edək ki, N.Qafarzadə 2014-cü il iyulun 6-da Yaşıl Teatrda həyat yoldaşına “Həyatımsan ömrüm qədər” adlı konsert vermişdi.

Milli.Az