Naxçıvan, 1 aprel, AZƏRTAC
Naxçıvan Muxtar Respublikası Dövlət Miqrasiya Xidməti tərəfindən muxtar respublikanın miqrasiya orqanlarına işə qəbulla bağlı elan olunan müsabiqənin test mərhələsinə martın 30-da start verilib.
AZƏRTAC xəbər verir ki, Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyada keçirilən və aprelin 3-dək davam edəcək 10 seansdan ibarət test imtahanlarında miqrasiya xidməti əməkdaşı olmaq istəyən 275 nəfər iştirak edəcək. İmtahan iştirakçılarına mövcud qanunvericiliklə bağlı 60, tarix və coğrafiyadan 10, informatikadan 10, məntiqi təfəkkürlə əlaqədar 20 sual olmaqla, 100 sual təqdim edilib.
Məlumat üçün bildirək ki, müsabiqədə iştirak üçün elektron ərizə ilə qeydiyyat bir ay müddətində – cari il fevralın 9-dan martın 10-dək aparılıb. Hər bir namizədin bilik səviyyəsinin, peşə hazırlığının, ümumi dünyagörüşünün, miqrasiya orqanlarında vəzifələrə yararlı və layiqli olmasının müəyyən edilməsi məqsədilə keçirilən müsabiqə test imtahanından və müsahibədən ibarətdir.
Xarici dil bilən və kompyuterdə işləmək bacarığı yüksək olan şəxslərə müsabiqənin müsahibə mərhələsində üstünlük veriləcək.