Riqa, 31 mart, AZƏRTAC
Avropa İttifaqı Şurasında Latviyanın sədrliyi (2015-ci il yanvarın 1-dən iyunun 30-dək) çərçivəsində martın 30-da Riqada adi vərəmlə və dərmanlara davamlı vərəmlə mübarizə üzrə “Şərq tərəfdaşlığı” ölkələrinin nazirlər səviyyəsində birinci konfransı başlanıb. Forum Ümumdünya Səhiyyə Təşkilatının (ÜST) Avropa Bürosunun və QİÇS, vərəm və malyariya ilə mübarizə üzrə Qlobal fondun himayəçiliyi ilə keçirilir.
Konfransda Avropa ölkələrinin nazirləri, Avropa İttifaqının, “Şərq tərəfdaşlığı” üzrə iştirakçı dövlətlərin, beynəlxalq qurumların və qeyri-hökumət təşkilatlarının nümayəndələri iştirak edirlər. Azərbaycanı Səhiyyə Nazirliyinin Ağciyər Xəstəlikləri Elmi-Tədqiqat İnstitutu direktorunun müavini İradə Axundova təmsil edir.
Müşavirənin əsas məqsədləri Avropa İttifaqı/Avropa İqtisadi Məkanı və “Şərq Tərəfdaşlığı” ölkələrində sabit səhiyyə sistemlərinin köməyi ilə və ən yüksək səviyyədə siyasi dəstəyin möhkəmləndirilməsi, informasiya-təbliğat fəaliyyətinin genişləndirilməsi vasitəsilə vərəmə tutulma hallarının azaldılmasına və nəticədə aradan qaldırılmasına kömək göstərməkdən, əhalinin zəif qruplarına və xəstəliyin sərhədləri keçməsinə xüsusi diqqət yetirməklə, həmçinin insan hüquqlarına əməl etməklə vərəmin profilaktikasına və müalicəsinə çoxbölməli və ümumi regional yanaşmaları stimullaşdırmaqdan ibarətdir.
Konfrans nümayəndələrinin vərəmə dair Riqa bəyannaməsi qəbul etməsi planlaşdırılır.

Nigar Cəfərli
AZƏRTAC-ın müxbiri
Riqa