Bakı, 31 mart, AZƏRTAC
Avropa İttifaqı ətraf mühitin mühafizəsi məqsədi ilə polietilen torbalardan istifadəni məhdudlaşdırmaq niyyətindədir.
Statistikaya əsasən hər bir avropalı il ərzində ətrafa 200-ə qədər istifadə edilmiş polietilen torba atır ki, bu tullantıların qalıqları ətraf mühitə xeyli dərəcədə zərər vurur. Eyni zamanda, onların parçalanmış hissələrinin içməli suyun, həmçinin ərzaq məhsullarının tərkibinə düşməsi təhlükəsi də mövcuddur.
AZƏRTAC Avropa Parlamentinin saytına istinadla xəbər verir ki, bu riskləri aradan qaldırmaq üçün Avropa İttifaqı polietilen torbaların istifadəsini məhdudlaşdırmaq fikrindədir. Avropa Parlamentinin üzvləri və Avropa İttifaqı Şurası bu məsələnin martın 31-də Ətraf Mühiti Mühafizə Şurası tərəfindən səsverməyə çıxarılması barədə razılığa gəliblər. Ümumi səsvermənin isə aprel ayında keçirilməsi planlaşdırılır.
Təkliflərdən birinə əsasən, Avropa Birliyi ölkələrində ətraf mühitə atılan polietilen torbaların sayını 2019-cu ilin sonlarında adambaşına 90-a, 2025-ci ilə qədər isə 40-a endirmək nəzərdə tutulur. Digər təklifə əsasən isə 2018-ci ilin sonundan etibarən bu tip torbaların alış-veriş mərkəzlərində pulsuz paylanmasına son qoyulmalıdır.
Qeyd edək ki, bu məhdudiyyətlərin, həmçinin plastik birdəfəlik qablara da şamil edilməsi nəzərdə tutulur.