Bakı, 31 mart, AZƏRTAC 
31 mart - Azərbaycanlıların Soyqırımı Günü ilə əlaqədar Suraxanı rayonundakı Heydər Əliyev Mərkəzində şagirdlər üçün azərbaycanlıların soyqırımı haqqında film nümayiş etdirilib. Heydər Əliyev Fondunun sifarişi ilə hazırlanmış filmdə erməni millətçilərinin xalqımıza qarşı apardığı soyqırımı və təcavüz siyasətindən bəhs olunub.
Suraxanı Rayon İcra Hakimiyyətindən AZƏRTAC-a bildirilib ki, tədbirdə ermənilərin törətdiyi dəhşətli cinayət hadisələri bir daha şagirdlərin diqqətinə çatdırılıb. Eyni zamanda, rayon ərazisində yerləşən tam orta məktəblərdə xüsusi dərslər keçirilib, şagirdlərin çəkdikləri rəsmlərdən ibarət sərgi təşkil olunub.
Tədbirdə çıxış edən 317 nömrəli tam orta məktəbin direktoru Əliqismət Səfərov bildirib ki, martın 31-i son iki yüz ildə Azərbaycan tarixində baş vermiş faciəli hadisələrin xalqın yaddaşındakı qanlı izlərini özündə əks etdirir. Azərbaycanlıların kütləvi şəkildə öldürülməsi, repressiyalara məruz qalması XX yüzilliyin ən qanlı səhifələrindən biridir. 1918-ci il martın 30-dan – aprelin 2-dək Bakı Kommunası və erməni şovinistləri Azərbaycanda kütləvi qırğınlar, qətliamlar törətməklə bəşər tarixində misli görünməmiş soyqırımına imza atıblar.
Suraxanı Rayon İcra Hakimiyyəti başçısının müavini Sevinc Hüseynova qeyd edib ki, 1998-ci il martın 26-da ümummilli lider Heydər Əliyevin imzaladığı “Azərbaycanlıların soyqırımı haqqında” Fərman erməni millətçilərinin hərəkətlərinə verilən ilk dolğun və hərtərəfli hüquqi-siyasi qiymətdir.
Bildirilib ki, Azərbaycanın problemlərinin beynəlxalq səviyyədə qaldırılması, erməni vandalizminin ifşası istiqamətindəki əzmkar və qətiyyətli fəaliyyət Prezident İlham Əliyev tərəfindən prinsipiallıqla davam etdirilir. Azərbaycanın birinci xanımı Mehriban Əliyevanın rəhbərliyi ilə Heydər Əliyev Fondu bu faciələrlə bağlı həqiqətlərin dünya ictimaiyyətinə çatdırılması yönümündə mühüm layihələr reallaşdırır.
Tədbirdə digər çıxış edənlər beynəlxalq ictimaiyyəti ermənilər tərəfindən Azərbaycan xalqına qarşı törədilmiş cinayətlərə siyasi-hüquqi qiymət verməyə çağırıblar.
Sonda məktəblilərin hazırladığı ədəbi-bədii kompozisiya nümayiş olunub.