Ukrayna böhranı səbəbindən Qərbin iqtisadi sanksiyları ilə qarşı-qarşıya qalan Rusiyanın buna analoji şəkildə cavab verməyə çalışması heç də hamını qanə etmir.

ANS TV-nin məlumatına görə, bu tədbirləri kifayət hesab etməyənlər Rusiya Duması qarşısında maraqlı bir aksiya keçiriblər.

Rusiya Dumasının millətvəkilləri qeyri -adi bir etiraz aksiyası ilə qarşılandılar. “Qida haqqında həqiqətlər” adlı ictimai təşkilat tərəfindən keçirilən qeyri -adi aksiyada soyuducunun içinə girən bir fəal deputatlardan geni dəyişdirilmiş məhsulların ölkəyə idxalının qadağan edilməsini tələb etdi. Özü fermer olan Andrey adlı fəal ucuz qiymətə Qərb ölkələrindən yeni dəyişdirilmiş məhsullar gətirildiyindən yerli sahibkarlar üçün məhsul yetişdirməyin sərfəli olmadığını bildirdi.

Bu problemi Dumaya çatdırmaq üçün hər yola başvurduqlarını, ancaq heç bir nəticə əldə edə bilmədiklərini deyən fermer soyuducudan gələn səsin millət vəkillərinin diqqətini çəkə biləcəyinə ümid edir.

Aksiya iştirakçısı Andrey Raşkin deyib ki, ölkələrində yeni dəyişdirilmiş məhsulların yetişdirilməsi qanunla qadağandır. Ancaq xaricdən ölkəyə belə məhsulların idxalına qadağa yoxdur. Onlar bu ikili standarta son verilməsini tələb edirlər.

Rəsmi rəqəmlərə görə, Rusiyada satılan qida məhsullarının 60 faizdən çoxunu yeni dəyişdirilmiş məhsullar təşkil edir. Qərb ölkələrində isə belə məhsulların satışı qanunla qadağan edilib. Aksiya polisin soyuducuya girən fəalı saxlaması ilə başa çatdı.

Mənbə
ANS TV, Aqşin Sabiroğlu