"Report" xəbər verir ki, bu gün Şəfiqə Məmmədovanın 70 yaşı tamam olur.
Şəfiqə Məmmədova 1945-ci ildə Dağıstanın Dərbənd şəhərində doğulub. 1968-ci ildə Azərbaycan Dövlət Teatr İnstitutunun Musiqili Komediya aktyorluğu fakültəsini bitirib.
1980-ci ildə Anarın "Şəhərin yay günləri" pyesinin tamaşasındakı Dilarə roluna görə Azərbaycan Dövlət mükafatına, Rasim Ocaqovun 1981-ci ildə çəkdiyi "İstintaq" filmindəki müstəntiqin arvadı obrazına görə isə SSRİ Dövlət mükafatına layiq görülüb.
1968-ci ildən Akademik Milli Dram Teatrınıntruppasına qəbul olunub. Aktrisa U. Şeksprin "Hamlet" (Gertruda), Aleksandr Şirvanzadənin "Nakam qız" (Sona), L. Tolstoyun "Canlı meyit" (Maşa), H.Cavidin "Xəyyam" (Sevda), C.Məmmədquluzadənin "Dəli yığıncağı" (Pırpız Sona) və s. obrazlara səhnə ömrü verib.
Şəfiqə Məmmədovanın Akademik Milli Dram Teatrının səhnəsində ifa etdiyi obrazlar bu gün də yaddaşlardadır. Ş.Məmmədova yaradıcılığının parlaq dövründə, 1980-ci ildə teatrdan uzaqlaşır və ADMİU-də (keçmiş Teatr İnstitutu) pedaqoji fəaliyyətə başlayıb.
Şəfiqə Məmmədovanın kino yaradıcılığı da, maraqlı obrazlarla zəngin olub. "Qaraca Qız" "Dədə Qorqud" "İstintaq" "Bizim Cəbiş müəllim" "Ad günü", "Xoşbəxtlik qayğıları" və. s. bədii filmlərdə maraqlı qadın obrazlarını ifa edib.
Şəfiqə Məmmədovanın qardaşı Məmməd Məmmədov da, aktyor olub. "Azərbaycanfilm" Kinostudiyasının ekranlaşdırdığı bir neçə filmdə ("Asif, Vasif, Ağasif", "Burulğan" və s.) filmlərdə baş rolları ifa edib.
Şəfiqə Məmmədova Azərbaycanın görkəmli teatr rejissoru Mehdi Məmmədovun həyat yoldaşı olub. Mehdi Məmmədovla birgə nigahından Ülvi adlı oğlu var. Ülvi Mehdi də, valideynlərinin sənət ömrünü davam etdirir. Kinossenarist kimi fəaliyyət göstərir.
Qeyd edək ki, ötən gün Azərbaycan Prezidenti İlham Əliyevin sərəncamı ilə Şəfiqə Məmmədovaya “Azərbaycan Respublikası Prezidentinin fəxri diplomu” verilib.