Paris, 28 mart, AZƏRTAC.
Martın sonundan etibarən Fransada bir çox məişət xidmətləri kimi, telefonların aylıq abunə haqqı da bahalaşıb. Ölkədə fəaliyyət göstərən “Orange” şirkətinin rəhbərliyi bildirib ki, son 10 ildə ilk dəfə abunə haqqının qiyməti qaldırılır və martın sonlarından abunəçilər hər ay üçün əlavə 1 avro ödəməlidirlər.
Şirkətin rəsmisi bildirib ki, əgər müştərilər əvvələr aylıq abunə haqqı üçün 16,96 avro ödəyirdilərsə, cari ilin martından 17,96 avro ödəməli olacaqlar. O, abunə haqqının artırılmasından əldə edilən gəlirin telefon xidməti şəbəkələinin müasir avadanlıqla təchiz edilməsinə sərf olunacağını söyləyib.
Fransada fəaliyyət göstərən digər telefon operatorları da aylıq abunə haqqının qiymətlərini qaldırıblar. “Numericable” operatorunun müştəriləri aylıq abunə haqqı üçün əlavə olaraq 1-3, SFR-in müştəriləri isə 1 avro ödəyəcəklər.
Aylıq abunə haqqının artırılmasının ölkəyə 100 milyon avro əlavə gəlir gətirəcəyi bildirilib.
Əsgər Əliyev
AZƏRTAC-ın xüsusi müxbiri
Paris