Bakı, 26 mart, AZƏRTAC
Yəmənin paytaxtı Sana şəhərində hava zərbələri nəticəsində 20-dən artıq insanın həlak olduğu bildirilir.
AZƏRTAC xəbər verir ki, bu barədə RİA Novosti agentliyi Sputnik agentliyinə istinadla məlumat yayıb. Məlumata görə, Səudiyyə Ərəbistanının rəhbərliyi ilə koalisiyanın başladığı hərbi əməliyyatlar zamanı şəhərin şimal hissəsinə aviazərbələr endirilib. Hədəf kimi bir sıra hökumət binaları və Sana aeroportu seçilib. Bəzi mənbələr hədəfin hərbi hava qüvvələrinin “Əl-Dilmi” bazası olduğunu bildirir. Hava zərbələri nəticəsində dinc əhali arasında ölüm hallarının olduğu haqqında məlumatlar da yayılıb.
Beynəlxalq hərbi əməliyyatlar Yəmən Prezidenti Əbd Rabbu Mənsur Hadinin ölkədə qanuni hakimiyyəti müdafiə etmək çağırışından sonra başlayıb. Əməliyyata Səudiyyə Ərəbistanı, Küveyt, Bəhreyn, Ərəb Əmirlikləri və Qətər qoşulub.