Bakı. 26 mart. REPORT.AZ/ Martın 21-də Moskvanın "Lujniki" idman kompleksində "Futbol qardaşlığı" layihəsi çərçivəsində "Futbol Novruzu" adlı mini-futbol turniri keçirilib.
"Report" xəbər verir ki, yarışın təşkilatçısı qismində Moskva şəhər Milli siyasət, dinlərarası əlaqələr və turizm Departamenti çıxış edib.
İdarədən bildirilib ki, turnirin təşkil olunmasında məqsəd Rusiya ərazisində yaşayan müxtəlif millətlərin nümayəndələri arasında birlik yaratmaqdır.
Yarışda səkkiz komanda iştirak edib. Birinci yeri azərbaycanlıların "Könüllülər" komandası (Moskva Dövlət Humanitar-İqtisad Universitetinin tələbələri), ikinci yeri "Alatoo" (Qırğız birliyi) və nəhayət, üçüncü yeri, Tacikistanın "Pamir" komandası tutub.