Hər il olduğu kimi bu dəfə də bayram günlərində təcili tibbi yardıma müraciət edənlərin sayında artım müşahidə olunub. Çağırışların əsas hissəsini mədə-bağırsaq sistemində yaranan problemlər təşkil edib. Bayram günlərində əlavə həkim briqadalarının yaradılması isə bütün çağırışların vaxtında təmin edilməsinə şərait yaradıb.

ANS TV-nin məlumatına görə, Novruz bayramı günlərində Bakı şəhər Təcili və Təxirəsalınmaz Tibbi Yardım Stansiyasına daxil olan müraciətlərin sayı artıb. Tibbi Yardım Stansiyasından bildirdilər ki, əgər adi günlərdə təcili yardıma 1800-1900 müraciət daxil olurdusa, bayram günlərində müraciətlərin sayı artaraq 2200-dən çox olub. Bayram günlərində poliklinikalar işləmədiyi üçün əsas yük təcili yardımın üzərinə düşür. Nəticədə bu günlərdə təcili yardıma daha çox müraciət daxil olur.Təcili yardıma müraciət edənlərin 9-10%-i xəstəxanalara yerləşdirilib.

“Bayram günlərində poliklinikalar işləmədiyi üçün əsas yük təcili tibbi yardımın üzərinə düşür. Biz həmişə gücləndirilmiş iş rejimində çalışırıq. Hazırda 140 qədər briqada fəaliyyət göstəriri”, – deyə Baş həkimin müavini Oqtay Şahmalıyev bildirib.

Bayram günlərində çağırışlar əsasən ürək, qan-damar sistemi, qan təzyiqinin artması və mədə-bağırsaq pozğunluğu ilə əlaqədar olub.

Mənbə
ANS-TV-Hürü Əliyeva