Belqrad, 21 mart, AZƏRTAC
Serbiyanın “Probjave” portalında Azərbaycan çörəyi lavaş haqqında məqalə yerləşdirilib.
Yazıda əsasən Azərbaycan Milli Kulinariya Assosiasiyasının prezidenti Tahir Əmiraslanovun lavaşla bağlı fikirlərinə yer verilib: “Azərbaycanda qədim dövrlərdən bişirilən lavaşdan dadan hər kəs uşaqlığını xatırlayır. Ölkəmizdə müxtəlif mərasimlərdə, ümumiyyətlə,  yemək süfrələrində vaxtaşırı istifadə olunan lavaş təndirdə oval, sacda isə dəyirmi formada bişirilir”.
Azərbaycan çörəyi lavaşın hazırlanma, yeyilmə qaydaları ilə bağlı məlumatın yer aldığı məqalədə deyilir: “XVII əsrdə yaşamış məşhur alman səyyahı Adam Olearinin qeydlərində azərbaycanlıların bu çörək növü haqqında məlumatlara rast gəlmək olar. Hazırda lavaş dünyanın müxtəlif ölkələrinin mətbəxinə də daxil edilib”.
                                                                                                                                                                                                    Maqsud Dadaşov
AZƏRTAC-ın xüsusi müxbiri
Belqrad