Naftalan, 20 mart, AZƏRTAC
Polşanın Uneyov şəhərinin meri Yuzef Kaçmarekin başçılıq etdiyi nümayəndə heyəti Naftalanda olub.
AZƏRTAC xəbər verir ki, polşalı qonaqlar əvvəlcə ümummilli lider Heydər Əliyevin abidəsini ziyarət edərək önünə tər çiçəklər düzüblər.
Heydər Əliyev Mərkəzi ilə tanış olan qonaqlara dünya şöhrətli sİyasətçinin həyatı, ictimai-siyasi fəaliyyəti haqqında ətraflı məlumat verilib.
Naftalan Şəhər İcra Hakimiyyətində keçirilən görüşdə icra başçısı Natiq Aslanov Azərbaycan ilə Polşa arasında ictimai-siyasi, iqtisadi və mədəni əlaqələrin gündən-günə inkişaf etdiyini diqqətə çatdırıb. Qeyd edib ki, kurort şəhəri olan Naftalanda iqtisadiyyatın əsasını turizm təşkil edir. Son iki ildə burada 3 müalicə-turizm mərkəzi istifadəyə verilib. Keçən il şəhərə 20 mindən çox turist gəlib.
Polşanın Uneyov şəhərinin rəhbəri Yuzef Kaçmarek bildirib ki, təmsil etdiyi ölkə Azərbaycan ilə daha sıx əlaqələr qurulmasına maraqlıdır. 1900 kvadrat kilometr ərazisi və 7 min 300-dən çox əhalisi olan Uneyov şəhəri də kurort şəhəridir. Müalicəvi sular turistlərin bu şəhərə axınına səbəb olur.
Sonra polşalı qonaqlar Naftalanda fəaliyyət göstərən kurort mərkəzləri, eləcə də şəhərin görməli yerləri ilə tanış olublar.