Bakı, 18 mart, AZƏRTAC
Suraxanı Rayon İcra Hakimiyyəti “Atəşgah məbədi” Dövlət Tarix-Memarlıq Qoruğunun qarşısındakı meydanda ümumrayon şənliyi keçirib.
İcra hakimiyyətinin başçısı İlqar Abbasov bayram şənliyində çıxış edərək Azərbaycan xalqının ümummilli lideri Heydər Əliyevin milli mənəvi dəyərlərimizə həmişə böyük hörmətlə yanaşdığını, adət-ənənələrimizin qorunub saxlanmasına daim diqqət və qayğı göstərdiyini söyləyib.
Bildirilib ki, Prezident İlham Əliyevin rəhbərliyi ilə ölkəmiz müstəqillik, demokratiya yolu ilə inamla addımlayaraq bütün sahələrdə geniş islahatlar proqramını həyata keçirir, dünya birliyinə uğurla inteqrasiya edir. Azərbaycanın birinci xanımı, Heydər Əliyev Fondunun prezidenti Mehriban Əliyeva xalqımızın milli varlığını özündə yaşadan maddi-mənəvi və intellektual irsə böyük həssaslıqla yanaşır, mədəniyyətimizin dünyada təbliğində böyük işlər görür.
Bayram konsertinin aparıcıları çıxışlarında qeyd ediblər ki, xalqımız doğma Azərbaycanımızın hər yerində qədim el bayramı olan Novruzu böyük sevinc və yüksək əhval-ruhiyyə ilə qeyd edir.
Şənlikdə incəsənət ustaları, bədii özfəaliyyət kollektivləri adət-ənənələrimizi, qədim el sənətlərimizi nümayiş etdiriblər.
Rayonda bayram tədbirləri davam edir.