Bakı, 17 mart, AZƏRTAC
“Rimera” şirkətlər qrupununa daxil olan, boru kəmərləri üçün birləşdirici hissələr istehsal edən Ural zavodu (“SOT”) “Cənub” qaz dəhlizi üçün təxminən 150 böyük diametrli hissə göndərəcək.
AZƏRTAC müəssisənin saytına istinadla xəbər verir ki, “SOT” ikinci kvartalın sonuna qədər Azərbaycan Dövlət Neft Şirkəti (SOCAR) üçün 500 ton birləşdirici detal göndərəcək. Məhsul partiyaları ТУ 1468-00274238272-07 seriyası ilə K52 poladdan hazırlanmış, diametri 1020, 1220 millimetr olan birləşdirici hissələr üzrə komplektləşdiriləcək. “Rimera” şirkətlər qrupu layihədə iştirak hüququnu ötən ilin sonunda tenderdə qalib gəlməsi nəticəsində qazanıb.
“Rimera” şirkətlər qrupunun kommersiya direktoru Konstantin Samsonov deyib: “Azərbaycan “SOT” məhsullarının xarici istehlakçıları arasında üç liderdən biridir. Biz on ilə yaxındır birləşdirici detalların təchizatı sahəsində SOCAR ilə uğurlu əməkdaşlıq edirik. Azərbaycandan olan tərəfdaşlar birləşdirici detalların, demək olar, bütün nomenkulatura sırasına, ilk növbədə diametri 720-1220 millimetr olan birləşdirici hissələrə böyük maraq göstərirlər. “Cənub qaz dəhlizi” layihəsi sayəsində bu il Azərbaycana göndərəcəyimiz yükün həcmində 2014-cü il ilə müqayisədə iki dəfədən çox artım gözlənilir”.