Bakı, 17 mart, AZƏRTAC
“Kənd təsərrüfatı ili” çərçivəsində Azərbaycan Respublikası Gənclər Təşkilatları Milli Şurası (ARGTMŞ) Gənclər və İdman Nazirliyinin dəstəyi ilə “Azərbaycan: 2020 Gələcəyə Baxış” İnkişaf Konsepsiyasının, “2015-2025-ci illərdə Azərbaycan Gənclərinin İnkişaf Strategiyası”nın prioritetlərinə uyğun olaraq ilk dəfə “Yerli Gənc” Əməkdaşlıq Proqramına start verib.
ARGTMŞ-dan AZƏRTAC-a bildiriblər ki, proqramın məqsədi kəndlərdə yaşayan gənclər ilə işin bir istiqamət kimi təbliğatının aparılması, gənclər təşkilatlarının kənd gəncləri ilə əməkdaşlığa stimullaşdırılması, kənd gənclərinin ictimai fəaliyyətə cəlb olunması, kənd gənclərinin bilik və bacarıqlarının üzə çıxarılması, kəndlərdə insan resurslarının inkişafına təkan verilməsidir.
Proqram çərçivəsində www.yerli.nayora.az ünvanında ARGTMŞ-ın üzvü olan gənclər təşkilatlarının əməkdaşlıq üçün müraciətləri qəbul ediləcək və cari fəaliyyətlərinin Azərbaycanın kəndlərində keçirilməsinə şərait yaradılacaq.