Praqa, 16 mart, AZƏRTAC
Çexiyanın baş naziri Boquslav Sobotka girovları saxlayan cinayətkar qruplarla danışıqlar aparmağın əleyhinə olduğunu bildirib. O deyib: “Güman edirəm ki, Çexiya Respublikası terrorçularla heç bir danışıq aparmayacaq”.
Baş nazir bu bəyanatının, özünü “İraq və Şam İslam Dövləti” (İŞİD) adlandıran terrorçu qruplaşmanın silahlılarının Liviyada ələ keçirdikləri neft yatağı işçiləri sırasında Çexiya vətəndaşının da olması ilə əlaqəli olduğunu dəqiq açıqlamayıb. B.Sobotka onu da əlavə edib ki, “Biz hər şeydən əvvəl başa düşməliyik ki, vətəndaşımız məhz harada saxlanılır. Yerdə qalan məsələlər vaxtından əvvəl aparılan sövdələşmələrdir”.
Baş nazir gözləyir ki, hökumətin iclasında ölkənin xarici işlər və xüsusi xidmət nazirliklərinin nümayəndələri ona terrorçular tərəfindən oğurlanmış Çexiya vətəndaşının axtarılması barədə məlumat verəcəklər.

Pərvanə Qarayeva
AZƏRTAC-ın xüsusi müxbiri
Praqa