Bakı, 16 mart, AZƏRTAC
Məlum olduğu kimi, 2014-cü il noyabrın 5-də Heydər Əliyev Fondunun vitse-prezidenti, IDEA İctimai Birliyinin təsisçisi Leyla Əliyevanın təşəbbüsü ilə “Ümumrespublika Yaşıllaşdırma Marafonu”na (“Yaşıl Marafon”) start verilib.
Layihənin əsas məqsədi yaşıllıq sahələrinin azalmasının yarada biləcəyi təhlükələrin qarşısını almaq və ağac əkilməsini təşviq edərək, ətraf mühitin mühafizəsinə töhfə verməkdən ibarətdir.
İctimai Birlikdən AZƏRTAC-a verilən məlumata görə, marafonun ilk mərhələsi (payız əkin mövsümü – 2014-cü ilin noyabr ayında) ictimaiyyət tərəfindən böyük maraqla qarşılanıb və Azərbaycan Respublikasının 76 rayon və şəhər icra hakimiyyətinin, özəl sektor nümayəndələrinin və vətəndaşların iştirakı ilə qısa müddətdə ölkə ərazisində 800 minə yaxın ağac əkilib.
IDEA İctimai Birliyi yaz əkin mövsümünün gəlişi ilə əlaqədar “Ümumrespublika Yaşıllaşdırma Marafonu”nun ikinci mərhələsinə başlandığını elan edir və bütün maraqlı təşkilatları bu layihədə iştiraka dəvət edir.
Marafonun gedişi IDEA İctimai Birliyinin internet səhifəsində (http://ideacampaign.org/green_marathone/) mütəmadi olaraq işıqlandırılmaqda davam edəcək və müxtəlif şəhər və rayonlarda əkilən ağacların sayı, ünvanı, şəkilləri və digər məlumatlar həmin internet səhifəsində yerləşdiriləcək.
“Ümumrespublika Yaşıllaşdırma Marafonu”nun bu ilin may ayının əvvəlində başa çatması planlaşdırılır.