Çempionlar Liqasında vurduğu qolların sayına görə tarixi rekorda imza atan portuqaliyalı futbol ulduzunun rekordları siyahısına daha biri əlavə edilib.

ANS PRESS-in məlumatına görə, Portuqaliya millisinin üzvü, “Real”ın bombardir futbolçusu Kriştiano Ronaldonun populyarlığı sosial şəbəkədə də öz üstünlüyünü göstərməkdədi.

Belə ki, ötən il “Facebook” sosial şəbəkəsində ən çox istifadəçisi olan səhifə müğənni Şakiranın səhifəsi qəbul edilsə də, artıq elə deyil. Çünki Ronaldonun pərəstişkarlarının canfəşanlığı sayəsində məşhur müğənninin səhifəsi yerini dəyişməli olub və ikinci yerə düşüb.

Ronaldonun “Facebook” tərəfindən təsdiqlənən rəsmi səhifəsində hazırda 107.100.991 nəfər, onu izləyən Şakiranın səhifəsində isə 107.099.519 istifadəçi var.

Onu da qeyd edək ki, Ronaldonun futbol aləmində rəqibi kimi göstərilən Lionel Messinin isə səhifəsini 78.286.404 nəfər istifadəçi bəyənib.
Mənbə
ANS PRESS