Oğuz, 13 mart, Mustafa Dadaşov, AZƏRTAC
Prezident İlham Əliyevin həyata keçirdiyi siyasət sayəsində Azərbaycanın gücü və qüdrəti gündən-günə artır. Azərbaycana qarşı hansısa qüvvələr din vasitəsilə təxribat törətmək istəsələr, biz belə qüvvələrin qarşısını qətiyyətlə alacağıq.
AZƏRTAC xəbər verir ki, bu sözləri Dini Qurumlarla İş üzrə Dövlət Komitəsinin sədri Mübariz Qurbanlı Oğuz şəhərində keçirilən konfrans zamanı jurnalistlərə müsahibəsində deyib.
Komitə tərəfindən bu istiqamətdə təbliğat işinin daha da genişləndirildiyini diqqətə çatdıran Mübariz Qurbanlı qeyd edib: “Dini Qurumlarla İş üzrə Dövlət Komitəsinin tərtib etdiyi tədbirlər planına uyğun olaraq bölgələrdə davamlı olaraq dini maarifləndirmə tədbirləri, “dəyirmi masa”lar keçirilir. Komitənin mütəxəssislərinin və dinşünas alimlərin iştirakı ilə keçirilən belə tədbirlərdə açıq söhbət aparılır. İştirakçılara islami dəyərlərimiz, milli adət-ənənələrimiz, eyni zamanda, ölkəmizdə din sahəsində həyata keçirilən siyasət və onun istiqamətləri barədə ətraflı məlumat verilir. Belə tədbirlər maarifləndirmə baxımından önəmli rol oynayır”.