Bakı, 12 mart, AZƏRTAC
Martın 14-də Quba Olimpiya İdman Kompleksində Dünya Boks Seriyası (WSB) Liqasının 9-cu turunun görüşü keçiriləcək. Ölkəmizi bu yarışda təmsil edən “Baku Fires” klubu Venesuelanın “Caciques Venezuela” komandası ilə qarşılaşacaq.
AZƏRTAC xəbər verir ki, artıq komandaların heyəti açıqlanıb. Belə ki, Cavid Dadaşov (49 kq, “Baku Fires”) Martinez Kordova (“Caciques Venezuela”), Məhəmməd Qurbanov (56 kq) Villaviçenzio Rodriges, Heybətulla Hacəliyev (64 kq) Arkon Dias, Jaba Xositaşvili (75 kq) Barrera Korbaj, Əbdülqədir Abdullayev (91 kq) isə Villi Kyakone ilə qarşılaşacaqlar.
Venesuela klubu ilə qarşılaşmada komandamızın heyətində Cavid Dadaşov debüt edəcək. C.Dadaşov 2013-cü ildə gənclər arasında Azərbaycan birinciliyinin finalçısı olub. Qonaq komandanın 49 və 56 kiloqram çəki dərəcələrindəki boksçuları reytinqdə yüksək yerlər tutsalar da Qubaya gəlməyiblər. Görünür, “Caciques Venezuela” klubunun məşqçiləri həmin idmançıları doğma divarlar arasında keçiriləcək görüşlərə hazırlayırlar.
Komandamız səfərdə “Caciques Venezuela” klubuna 2:3 hesabı ilə məğlub olmuşdu.