Bakı, 12 mart, AZƏRTAC 
Sosial şəbəkələrdə sahibsiz heyvanların məhv edilməsi ilə bağlı əsassız şəkildə yayılmış məlumatlara aydınlıq gətirmək məqsədilə martın 12-də Kənd Təsərrüfatı Nazirliyi yanında Dövlət Baytarlıq Nəzarəti Xidmətində (DBNX) brifinq keçirilib.
AZƏRTAC xəbər verir ki, Xidmətin rəisi Sialə Rüstəmova sosial şəbəkələrdə yayılmış məlumatın əsassız olduğunu vurğulayıb. Xidmət rəisi diqqətə çatdırıb ki, bu cür yanlış informasiyalar ictimaiyyətdə narahatlıq yaratmağa xidmət edir. Qeyd olunub ki, Azərbaycan Respublikası 1997-ci ildə “Heyvanların Mühafizəsi” ilə bağlı Avropa Konvensiyasına qoşulub, həmçinin bir sıra normativ hüquqi sənədlər hazırlanıb.
S.Rüstəmova 2014-cü ildə Kənd Təsərrüfatı Nazirliyi yanında Dövlət Baytarlıq Nəzarəti Xidməti tərəfindən 250 minə yaxın itdə quduzluq xəstəliyinə qarşı peyvəndləmə aparıldığını bildirərək qeyd edib ki, bu işlər cari ildə də görüləcək. Eyni zamanda, kənd təsərrüfatı naziri Heydər Əsədovun göstərişinə əsasən, Azərbaycanda ilk dəfə oral üsulu ilə vəhşi təbiətdə immunizasiya aparılacaq. Bununla əlaqədar Dövlət Baytarlıq Nəzarəti Xidmətində çevik dəstələr yaradılıb, xəritələr hazırlanıb. Həmin xəritələrə uyğun olaraq Abşeron yarımadası, Balakən, Şəki, Zaqatala, Qəbələ, İsmayıllı rayonlarının meşə zonalarında, eləcə də Bakı və Sumqayıt şəhərlərində, şəhərətrafı ərazilərdə, küçələrdə sahibsiz və vəhşi təbiətdə olan heyvanlarda immunizasiya aparılacaq.