Bakı, 12 mart, AZƏRTAC
Martın 12-də Dini Qurumlarla İş üzrə Dövlət Komitəsində Türkiyə Baş nazirinin böyük müşaviri professor Hacı Bəkir Karlığanın başçılıq etdiyi nümayəndə heyəti ilə görüş keçirilib.
Komitənin mətbuat xidmətindən AZƏRTAC-a bildiriblər ki, görüşdə sədr Mübariz Qurbanlı bu yaxınlarda Türkiyəyə etdiyi səfərdən danışıb. Qeyd edib ki, Türkiyənin türk-müsəlman dövləti olaraq Sivilizasiyalar Alyansının yaradılmasında və fəaliyyətində böyük rolu var. Qloballaşan dünyada isə sivilizasiyaların anlaşması və dialoqu olduqca mühüm məsələdir.
Hacı Bəkir Karlığa deyib ki, Türkiyə və Azərbaycan qardaş ölkələrdir və hər iki ölkənin kədəri də, sevinci də eynidir. Qonaq BMT Sivilizasiyalar Alyansının 2016-cı ildə Bakıda keçirilməsi nəzərdə tutulan VII Qlobal Forumu ilə bağlı fikirlərini bölüşüb. Qeyd edib ki, ölkələrimiz arasında bilik və təcrübə mübadiləsi ümumi işimizə böyük fayda verəcək. Tolerantlıq baxımından bütün dünyaya nümunə olan və multikulturalizmin dövlət səviyyəsinə qaldırıldığı Azərbaycanın belə bir Foruma ev sahibliyi etməsi çox vacibdir. Bu cür forumların keçirilməsi sahəsində Azərbaycan böyük təcrübəyə malikdir.
Sonra Foruma hazırlıq çərçivəsində görüləcək işlər, 127 ölkənin iştirak edəcəyi tədbirdə Azərbaycanın yüksək səviyyədə təqdimatı, komitənin bu sahədə görə biləcəyi işlər ərtafında fikir mübadiləsi aparılıb.
Görüşdə türk və İslam dünyasının dünya elminə və mədəniyyətinə mühüm töhfələr verməsi, dünya mədəniyyət tarixində böyük rolu olması kimi vacib məsələlərin yüksək səviyyəli tədbirlər vasitəsilə dünya ictimaiyyətinə çatdırılmasının zəruriliyi vurğulanıb.