Kiyev, 12 mart, AZƏRTAC
AZƏRTAC Ukrayna KİV-lərinə istinadla xəbər verir ki, Donetskin “Şaxtyor” klubu UEFA Çempionlar Liqasının 1/8 finalı çərçivəsində səfər matçında Münxenin “Bavariya” klubuna 0:7 hesabı ilə məğlub olub.
“Şaxtyor”un qolkiperi birinci taymda öz qapısından iki dəfə top çıxarıb. Fasilədən sonra “Bavariya” daha beş cavabsız qol vurub.
“Şaxtyor”un baş məşqçisi Mirça Luçesku matçdan sonra mətbuat konfransında deyib: “Biz elə parametrlərə görə uduzduq ki, həmin parametrlərə görə, yəni xaraktercə, taktikada və təkbətək mübarizədə “Bavariya” bizdən güclüdür. Əslində, üçüncü qoldan sonra - Srna meydanı tərk edəndə və ona yardım göstəriləndə, bavariyalılar isə üçüncü dəfə qol vuranda mübarizə başa çatdı. Azlıqda oynamaq çox çətindir, topu belə asanlıqla itirmək olmaz. Rəqib üç dəfə əks-hücum zamanı qol vurub. Belə olmamalı idi, daha yığcam oynamaq lazım idi. Bizə bəraət yoxdur. Lakin məni incidən budur ki, həmişə olduğu kimi, böyük komandalara kömək edirlər”.
Xatırladaq ki, bu komandalar arasında birinci matç heç-heçə başa çatıb: 0:0.
Zeynal Ağazadə
AZƏRTAC-ın xüsusi müxbiri
Kiyev