Kazan şəhərində yerləşən “Admiral” ticarət mərkəzində ötən gün baş verən yanğın nəticəsində Azərbaycandan olan iş adamlarına böyük ziyan dəyib.

ANS PRESS-in məılumatına görə, ticarət mərkəzində açıldığı gündən işləyən 27 yaşlı azərbaycanlı gənc deyib ki, 3 mağazası və 6-7 milyon rubl dəyərində malı yanıb: "Demək olar, heç nəyi xilas edə bilmədik. Mallarımız sığortalanmışdı. Kazan elə bir şəhərdir ki, burda bütün bazarlar yanır, yəqin, yenə də yanacaq."

Adının açıqlanmasını istəməyən sahibkarın sözlərinə görə, qışda satışlar az olduğu üçün satıcılar yeni mövsüm malları almağa hazırlaşırdılar. Ümumilikdə ticarət mərkəzində 1200 sahibkar çalışıb. Çalışanlar arasında tatarlar, ruslar və azərbaycanlılar daha çox olub. İndi onların hamısı iş yerlərindən məhrum olublar.

Rüstəm adlı digər sahibkar hadisə zamanı canlarını bir təhər xilas etdiklərini bildirib: "Biz yanan binadan son anda çıxa bildik. Alov kafe olan istiqamətdən sürətlə yayılmağa başladı."

Mənbə
ANS PRESS