Yevlax, 11 mart, AZƏRTAC
Azərbaycan Respublikası Prezidenti yanında Bilik Fondunun həyata keçirdiyi “İlboyu bilik” proqramının “Qardaşlaşmış məktəblər” layihəsi çərçivəsində martın 11-də Balakən şəhər humanitar və texniki təmayüllü liseyin şagirdləri Yevlax şəhərinə səfər ediblər.
AZƏRTAC xəbər verir ki, balakənli məktəblilər şəhərin mərkəzi meydanında Yevlax şəhər 5 nömrəli tam orta məktəbin şagirdləri və rayon ziyalıları tərəfindən mehribanlıqla qarşılanıblar.
Məktəblilər ümummilli lider Heydər Əliyevin abidəsi önünə gül-çiçək dəstələri düzərək, xatirəsini ehtiramla yad ediblər.
Sonra B.Səfəroğlu adına Xalq Teatrına gələn məktəblilər “Tariximiz – qan yaddaşımız” mövzusunda əl işlərindən ibarət sərgiyə, Yevlax şəhər 10 nömrəli və Əkşəm kənd orta məktəblərinin şagirdlərinin hazırladıqları kompozisiya baxıblar.
Bilik Fondunun icraçı direktoru Oktay Səmədov çıxış edərək, qurumun fəaliyyəti və həyata keçirdiyi layihələr barədə məlumat verib. Bildirilib ki, “Qardaşlaşmış məktəblər” layihəsi gənclərdə vətənpərvərlik ruhunun yüksəldilməsində, onların dünyagörüşünün inkişafında və intellektual səviyyələrinin formalaşmasında, müxtəlif bölgələrdən olan məktəblilər arasında “bilik körpüsü”nün yaradılmasında mühüm rol oynayır. Qeyd olunub ki, aprel ayında Yevlax məktəblilərinin Balakənə səfəri təşkil ediləcək.
Daha sonra Yeni Azərbaycan Partiyası Yevlax rayon təşkilatının binasında “Qardaşlaşma haqqında” sazişin müddəaları müzakirə olunub, əlavə və dəyişikliklərdən sonra sənəd imzalanıb.
Məktəblilər Yevlaxdakı Heydər Əliyev Mərkəzini ziyarət edib, tarix diyarşünaslıq muzeyində, rayonun görməli yerlərində olublar.