İsmayıllı, 11 mart, AZƏRTAC
Əmək və Əhalinin Sosial Müdafiəsi Nazirliyi (ƏƏSMN) martın 11-də İsmayıllıda tibbi-sosial ekspertiza və reabilitasiya xidmətinin elektron-informasiya sisteminin tətbiqi ilə əlaqədar əlillik müayinəsi üçün göndəriş formalarının düzgün və müasir tələblərə uyğun tərtibi məsələlərinə həsr olunan zona müşavirəsi keçirib.
AZƏRTAC xəbər verir ki, tədbirdə Balakən, Zaqatala, Qax, Şəki, Oğuz, Qəbələ, İsmayıllı, Şamaxı, Ağsu, Qobustan, Ağdaş, Göyçay, Ucar və Zərdab rayonlarının Tibbi-Sosial Ekspert komissiyaları (TSEK), səhiyyə müəssisələrinin məsul şəxsləri və əməkdaşları iştirak ediblər.
Əmək və əhalinin sosial müdafiəsi nazirinin müavini Natiq Məmmədov müşavirədə nazirlik tərəfindən tibbi-sosial ekspertiza və reabilitasiya xidmətində elektron-informasiya sisteminin tətbiq olunmasının əlillik təyinatı prosedurunun şəffaflaşdırılmasına, bu sahədə fəaliyyət mexanizminin müasir tələblərə uyğun qurulmasına xidmət etdiyini vurğulayıb. Səhiyyə müəssisələri ilə TSEK-lər arasında əlillik müayinəsi üçün müvafiq məlumatların elektron mübadiləsinə imkan verən bu sistem vasitəsilə, eyni zamanda, elektron məlumat bazası da yaradılıb. Bu baza isə öz növbəsində aidiyyəti dövlət orqanlarına əlillik müayinələrinin nəticələri ilə bağlı müvafiq məlumatları elektron yolla əldə etməyə imkan verir.
N.Məmmədov sistemin tətbiqi ilə əlaqədar Səhiyyə Nazirliyinin müvafiq əmrinə əsasən TSEK-lərə göndərişlərin elektron registrinin yaradıldığını, habelə “Tibbi-sosial ekspert komissiyasına göndəriş” və “Uşaqlar üçün tibbi-sosial ekspert komissiyasına göndəriş” formalarının təsdiq edildiyini bildirib. Qeyd olunub ki, əlillik müayinələri artıq bu göndəriş formaları əsasında aparılır. Hazırda səhiyyə müəssisələri tərəfindən göndərişlərin hazırlanması və elektron informasiya sistemi vasitəsilə TSEK-lərə göndərilməsi, həmin göndərişlərdə diaqnozun, eləcə də ağırlaşma hallarının düzgün və obyektiv müəyyən olunması üçün qarşıya çıxan məsələlərin birgə araşdırılmasına ehtiyac var.
Müşavirədə bütün bu məsələlər, o cümlədən əlillik müayinəsi üçün göndəriş formalarının tərtib olunması prosedurunun təkmilləşdirilməsi, habelə müayinənin nəticələrinin müvafiq beynəlxalq təsnifat əsasında rəsmiləşdirilməsi məsələləri geniş müzakirə olunub, təkliflər irəli sürülüb.