Bakı, 11 mart, AZƏRTAC
Azərbaycan Tələbə Gənclər Təşkilatları İttifaqı (ATGTİ) və “Bakı- 2015” Avropa Oyunları Əməliyyat Komitəsinin maliyyə dəstəyi ilə I Avropa Oyunlarının keçirilməsində könüllü qismində iştirak edəcək bütün könüllülərə könüllü fəaliyyətlərinin qeydə alınması üçün Azərbaycanda ilk dəfə ATGTİ tərəfindən tətbiq olunan “Könüllülük pasportu” təqdim ediləcək.
ATGTİ-dən AZƏRTAC-a bildiriblər ki, pasport gənclərimizə gələcək karyeralarını qurarkən lazım olacaq əlavə CV xarakteri daşıyır. Könüllülər göstərdikləri könüllü fəaliyyətini bu pasportda qeyd etdirməklə özlərinə ictimai fəallığı əks etdirən yeni bir CV yaratmış olacaqlar. “Könüllülük pasportu” könüllülərin aktiv fəaliyyətinin qeyd olunması, onların I Avropa Oyunları kimi digər mötəbər tədbirlərin təşkilatçısı qismində çıxış etməsi üçün zəmin yaradacaq.
“Könüllülük pasportu”nun verilməsində məqsəd könüllülərin göstərdiyi bu fəallığı qeydə almaqla onlara stimul vermək, respublikada könüllülük fəaliyyətinin qeydiyyatını aparmaqdır. Pasportlar ATGTİ tərəfindən qeydiyyata götürülür və ştamp vurularaq nömrələnir.
Pasporta könüllülük fəaliyyəti göstərən hər bir gənc sahib ola bilər. İlk pasportlar ATGTİ-nin fəaliyyətində xüsusi fəallığı ilə seçilən tələbələrə təmənnasız olaraq verilib.