Ağsu, 11 mart, AZƏRTAC
Ağsuda Yel çərşənbəsi xüsusi mərasimlərlə qeyd olunub.
AZƏRTAC xəbər verir ki, martın 10-da axşamüstü başlanan şənliklər gecə yarısınadək davam edib. Əsas şənlik isə rayonun mədəniyyət və istirahət parkında keçirilib. Ağsu musiqi məktəbinin həyətindən başlanan, daha sonra isə şəhər parkında davam edən şənlikdə minlərlə sakin, o cümlədən ağsaqqallar, gənclər, uşaqlar aparıcının Yel çərşənbəsi ilə bağlı söylədiyi xalq deyimlərini, rəvayətləri maraqla dinləyiblər.
Balacaların tonqal ətrafında Yel çərşənbəsinə dair səsləndirdikləri nəğmələr, musiqiçilərin ifasında xalq mahnıları iştirakçılarda xoş bayram əhval-ruhiyyəsi yaradıb.