Bakı, 7 mart, AZƏRTAC
8 mart-Beynəlxalq Qadınlar Günü münasibətilə Qaradağ rayonunda bayram tədbiri keçirilib.
Rayon icra hakimiyyətinin başçısı Süleyman Mikayılov tədbirdə çıxış edərək zəriflik və gözəllik rəmzi olan qadın, ana adının tarix boyu vətənimizdə həmişə uca tutulduğunu, Azərbaycan qadınının bütün dövrlərdə milli mənəvi dəyərlərimizin qorunub saxlanması və yaşadılmasında mühüm xidmətlər göstərdiyini qeyd edib. Bildirib ki, Azərbaycanda qadına daim böyük hörmət bəslənilib, ana həmişə müqəddəs olub, namus, qeyrət rəmzi sayılıb. Ulu öndər Heydər Əliyev qadınların ölkə həyatındakı xidmətlərini, gənc nəslin sağlam, vətənpərvərlik ruhunda böyüməsində sərf etdikləri əməyi hər zaman yüksək qiymətləndirib, onlara daim diqqət və qayğı göstərib. Azərbaycan qadını hər zaman ölkənin ictimai-siyasi həyatında fəal rol oynayır. Bu gün Azərbaycanın birinci xanımı, Heydər Əliyev Fondunun prezidenti Mehriban Əliyeva bütün dünyaya sübut edir ki, Azərbaycan qadını həm gözəl ana, həm də fəal ictimai xadim ola bilər.
Sonda rayonun ictimai-siyasi həyatında fəallığı ilə seçilən xanımlara fəxri fərmanlar və hədiyyələr təqdim olunub. Tədbir konsert proqramı ilə davam edib.