Sumqayıt, 7 mart, AZƏRTAC
Sumqayıt Dövlət Universitetində (SDU) Azərbaycan üçün mühəndis təhsilində tədris prosesinin Boloniya prosesinə uyğunlaşdırılması üzrə TEMPUS layihəsi müzakirə edilib.
SDU-nun mətbuat xidmətindən AZƏRTAC-a bildirilib ki, universitetin rektoru Elxan Hüseynov ilə Köln Tətbiqi Elmlər Universitetinin professoru Reza Talebi-Daryaninin görüşündə bakalavr və magistr təhsilinin akkreditasiya məsələləri diqqət mərkəzində olub.
Layihənin koordinatoru, professor Reza Talebi-Daryani səfərinin əsas məqsədinin martın 29-dan aprelin 2-dək Almaniyanın ASİİN akkreditasiya təşkilatı tərəfindən Sumqayıt Dövlət Universiteti, Azərbaycan Texniki Universiteti və Azərbaycan Dövlət Neft Akademiyasında üç bakalavr və üç magistr proqramının akkreditasiya olunmasına hazırlıqla bağlı olduğunu bildirib. Layihənin koordinatoru Reza Talebi-Daryani son dövrlər SDU-da həyata keçirilən layihələrin uğurlarından danışaraq, universitetdə müasir standartlara cavab verən laboratoriyaların fəaliyyətini yüksək qiymətləndirib.
Görüşdə mühəndis təhsilinin təkmilləşdirilməsi və TEMPUS layihələrinin akkreditasiyasının nəzərdə tutulduğu diqqətə çatdırılıb.