Bakı, 5 mart, AZƏRTAC
Martın 5-də Azərbaycan Milli İncəsənət Muzeyində 8 Mart-Beynəlxalq Qadınlar Gününə həsr olunmuş tədbir keçirilib.
AZƏRTAC xəbər verir ki, tədbirdə hökumət nümayəndələri, tanınmış elm və mədəniyyət xadimləri iştirak edib.
Mərasimdə xalq artisti Fərhad Bədəlbəylinin rəhbərliyi ilə Üzeyir Hacıbəyli adına Bakı Musiqi Akademiyasının gənclər kamera orkestrinin konserti təqdim olunub. Orkestrin dirijoru Fuad İbrahimovdur.
Fərhad Bədəlbəyli xanımları təbrik edərək bu tədbirin onlara hədiyyə olduğunu söyləyib.
Konsertdə dünya və Azərbaycan bəstəkarlarından əsərləri səsləndirilib. Əsərləri solistlər - beynəlxalq müsabiqələr laureatları Aytac Şıxəlizadə, Emin Bağırov, Ümidə Abbasova və əməkdar artist Sahib Paşazadə ifa ediblər.
Tədbir çərçivəsində, həmçinin Azərbaycan Milli İncəsənət Muzeyinin kolleksiyasında qorunan qadın obrazına həsr edilmiş əsərlərdən ibarət “Gözəlliyin tükənməz çalarları” adlı sərgi açılıb.
Azərbaycanın tarixi, mədəni, ictimai və mədəni həyatında görkəmli rol oynamış qadınların surətlərinin əks olunduğu sərgidə Azərbaycanın tanınmış fırça ustalarının əsərləri sərgilənib.
Ümumilikdə, sərgidə 20-dən artıq Azərbaycan rəssamının 36 rəngkarlıq əsəri nümayiş olunub.