Bakı, 5 mart, AZƏRTAC
Xətai rayonu 269 nömrəli tam orta məktəbdə 5 mart – Bədən Tərbiyəsi və İdman Gününə həsr olunan tədbir keçirilib.
AZƏRTAC xəbər verir ki, tədbirdə Xətai Rayon İcra Hakimiyyəti başçısının müavini Jalə Abdıyeva, Bakı Şəhər Gənclər və İdman Baş İdarəsinin (BŞGİBİ) baş məsləhətçisi Salman Əbdülov, Xətai rayon Gənclər və İdman İdarəsinin rəisi Əfqan Rzayev, məktəbin direktoru Alla Vəzirova və başqaları iştirak ediblər.
Tədbir iştirakçıları əvvəlcə rayon məktəblilərinin XXVII spartakiadasının proqramına daxil olan oğlanlar arasında voleybol yarışlarının final oyununu izləyiblər.
Sonra Xətai rayon məktəbliləri arasında spartakiadanın yekunlarına görə qalib məktəblərin, həmçinin qızlar arasında basketbol yarışında ikinci yeri tutan komanda üzvlərinin mükafatlandırma mərasimi keçirilib.
Tədbirdə çıxış edənlər qalib komandanın üzvlərini və məşqçi-müəllimləri əldə olunan yüksək nəticələr münasibətilə təbrik edib, onlara növbəti yarışlarda müvəffəqiyyətlər arzulayıblar.