Salyan, 5 mart, Mahir Babayev, AZƏRTAC
Salyandakı Heydər Əliyev Mərkəzində keçirilən Yeni Azərbaycan Partiyası (YAP) Salyan rayon təşkilatı Gənclər Birliyinin IV konfransında hesabat dövründə görülən işlərə yekun vurulub, qarşıda duran vəzifələr müəyyənləşdirilib.
AZƏRTAC xəbər verir ki, konfrans iştirakçıları əvvəlcə ümummilli lider Heydər Əliyevin abidəsini ziyarət edib, Ulu Öndərin adını daşıyan Mərkəzdə nümayiş etdirilən foto və sənədlərlə tanış olublar.
Konfransda vurğulanıb ki, 95 ərazi ilk partiya təşkilatı 7300  partiya üzvünü birləşdirir. Siyasi həmfikirlərin 3014 nəfəri gənclərdir.
Bildirilib ki, ötən konfransdan sonra gənclərimiz bütün sahələrdə əhəmiyyətli nəticələr əldə edib, qarşıya qoyulan vəzifələri uğurla yerinə yetiriblər. Sağlam və savadlı gənc nəslin yetişməsi üçün dövlətimizin başçısının imzaladığı sərəncam və fərmanları diqqətə çatdıran natiqlər rayonda  76 gəncin dövlət qulluğunda çalışmasını, 37 gəncin sahibkarlıq fəaliyyəti ilə məşğul olmasını dövlətin gəncliyə etimadının nəticəsi kimi səciyyələndiriblər.
Çıxış edən gənclər ölkəmizin inkişafı üçün bundan sonra da səylə çalışacaqlarını bildirib və onlar üçün yaradılan şəraitə görə dövlətimizin başçısına minnətdarlıq ediblər.
Sonra təşkilati məsələlərə baxılıb. Rayon təşkilatı Gənclər Birliyinin Şurası və idarə heyəti müəyyənləşdirilib, YAP Gənclər Birliyi respublika konfransına nümayəndələr seçilib.