Bakı, 5 mart, AZƏRTAC
Xəbər verdiyimiz kimi aprelin 14-dən 16-dək Londonda beynəlxalq kitab sərgisi təşkil olunacaq.
Mədəniyyət və Turizm Nazirliyinin təşkilatçılığı ilə ölkəmizin artıq 7-ci dəfə iştirak edəcəyi sərgiyə hazırlıq işləri yekunlaşıb.
Nazirlikdən AZƏRTAC-a bildirilib ki, hazırlıq prosesində təşkilatçılarla danışıqlar aparılıb, milli stendi təşkil etmək məqsədilə sərgidə 40 kvadratmetrlik sahə icarəyə götürülüb, “Qız qalası” formasında milli ekspozisiyanın qurulması başa çatdırılıb.
Nümayəndə heyətinin tərkibində sərgiyə qatılacaq Azərbaycan Respublikasının Nazirlər Kabineti yanında Tərcümə Mərkəzi, “Hədəf”, “Qələm” və “Altun Kitab” nəşriyyatları ilə danışıqlar aparılıb, iştirakla bağlı mümkün köməklik göstərilib.
Həmçinin, sərgi zamanı nümayiş etdiriləcək nazirliyin dəstəyi ilə nəşr olunmuş, Azərbaycanın mədəniyyətinə, ədəbiyyatına, turizm imkanlarına, Qarabağa aid bir çox kitab və reklam çap məhsullarının siyahısı hazırlanıb. Tezliklə, nəşr məhsulları Londona göndəriləcək.