Zaqatala, 5 mart, Mustafa Dadaşov, AZƏRTAC
Bu il Zaqatala rayonunun ərazisində 135 məcburi köçkün ailəsi üçün zəruri sosial-texniki infrastrukturu olan yeni yaşayış məhəlləsi salınacaq. Bu məqsədlə rayonun Aşağı Tala kəndinin ərazisində 2 hektar torpaq sahəsi ayrılıb. Yeni salınacaq məhəllənin layihələndirmə işləri də artıq başa çatdırılıb və ekspertizadan keçirilmək üçün aidiyyəti dövlət qurumuna təqdim olunub.
Bu barədə Zaqatala Rayon İcra Hakimiyyətinin memarlıq və tikinti şöbəsinin müdiri, rayonun baş memarı Fərman Əhmədov AZƏRTAC-a müsahibəsində məlumat verib.
Qurumun rəsmisinin bildirdiyinə görə, məhəllədə hər biri 45 mənzildən ibarət 5 mərtəbəli 3 yaşayış binası inşa ediləcək. Bu evlərə rayonun müxtəlif ərazilərində məskunlaşmış məcburi köçkün ailələri köçürüləcək. Yeni yaşayış məhəlləsində 150 şagird yerlik məktəb binası, 50 yerlik uşaq bağçası, inzibati bina, klub, tibb məntəqəsi, rabitə obyekti tikiləcək, zəruri texniki infrastruktur da yaradılacaq.
Tikinti işlərinə yaxın vaxtlarda başlanılması nəzərdə tutulur.