Sumqayıt, 5 mart, Ətrabə Rzayeva, AZƏRTAC
Sumqayıt şəhərindəki Heydər Əliyev Mərkəzində “Ulu öndər Heydər Əliyev müstəqil Azərbaycanın memarı və qurucusudur” və “Ümummilli lider Heydər Əliyevin ideyaları müasir Azərbaycanın sosial-iqtisadi inkişafının təminatçısıdır” mövzularında növbəti açıq dərs keçirilib. Dərsdə Qubadlı rayon Mahmudlu və Mahruzlu kənd tam orta məktəblərinin XI sinif şagirdləri iştirak ediblər.
AZƏRTAC xəbər verir ki, məktəblilərə Ümummilli Liderin həyatı və fəaliyyəti barədə ətraflı məlumat verilib. Azərbaycançılıq məfkurəsinin formalaşmasında, milli kadrların yetişməsində, müstəqil dövlət təsisatlarının yaranmasında Ulu Öndərin müstəsna xidmətləri qeyd edilib. Bildirilib ki, açıq dərslərdən məqsəd ümummilli lider Heydər Əliyevin yüksək ideyalarını, ölkəmizin dövlət quruculuğu prosesində bu dahi şəxsiyyətin rolunu və xidmətlərini öyrənmək və bütün bunları gənc nəsillərə çatdırmaqdır. Vurğulanıb ki, çağdaş tariximizin 40 ili Ulu Öndərin adı ilə bağlıdır. Bu dövr Azərbaycanın tarixində şanlı və parlaq səhifəyə çevrilib.
Diskussiya şəraitində aparılan açıq dərsdə şagirdlərin sualları cavablandırılıb. Cari dərs ilinin noyabr-may aylarını əhatə edən açıq dərslərə rayonun 31 ümumtəhsil məktəbindən 401 nəfər XI sinif şagirdi qatılıb.
Şagirdlər Heydər Əliyev Mərkəzində Ulu Öndərin şərəfli həyat yolunu əks etdirən eksponatlar, fotoşəkil və kitablarla da tanış olub, sənədli filmə baxıblar.