Daşkənd, 4 mart, AZƏRTAC
Daşkənddəki podrobno.uz portalı Azərbaycanın iqtisadiyyat və sənaye naziri Şahin Mustafayevin Özbəkistana səfəri ilə bağlı material verib.
Məqalədə deyilir ki, Şahin Mustafayevin Özbəkistan baş nazirinin müavini Uluqbek Roziqulov, xarici iqtisadi əlaqələr, investisiya və ticarət naziri Eler Qəniyev və iqtisadiyyat naziri Qalina Saidova ilə görüşlər keçirib.
Danışıqlarda Özbəkistanla Azərbaycan arasındakı əlaqələrin indiki vəziyyəti və perspektivləri, həmçinin ticarət-iqtisadi, nəqliyyat-kommunikasiya və digər sahələrdə əməkdaşlığın genişləndirilməsi məsələləri müzakirə olunub.
Materialda deyilir ki, Azərbaycan tərəfi Özbəkistandan minik və yük maşınları, kənd təsərrüfatı, elektrik və məişət texnikası, inşaat materialları, toxuculuq məhsulları və digər malların alınmasına maraq göstərib.
Yazıda qeyd olunur ki, görüşdə ölkələr arasında nəqliyyat və transit sahələrində əməkdaşlıq məsələləri də diqqət mərkəzində olub, milli sənaye sərgilərinin yenidən keçirilməsi vacibliyinə toxunulub.
Tərəflər 2015-ci ildə istifadəyə verilməsi nəzərdə tutulan Bakı-Tbilisi-Qars dəmiryol xəttindən Özbəkistanın istifadə etməsi imkanları və perspektivləri ətrafında da geniş fikir mübadiləsi aparıblar.
Qeyd edilir ki, görüşdə 2015-ci ilin sonunadək Özbəkistan-Azərbaycan Hökumətlərarası Birgə Əməkdaşlıq Komissiyasının növbəti iclasının keçirilməsi də qərara alınıb.
Qulu Kəngərli
AZƏRTAC-ın xüsusi müxbiri
Daşkənd