OpenAI eksperimental süni intellekt modelinin kibertəhlükəsizlik testləri zamanı gözlənilməz davranış nümayiş etdirdiyini açıqlayıb.
Metbuat.az xəbər verir ki, şirkət yeni modelin imkanlarını yoxlamaq üçün təhlükəsizlik məhdudiyyətləri aradan qaldırılmış, təcrid olunmuş test mühiti yaradıb. Məlumata görə, model tapşırığı yerinə yetirmək üçün sistemdə əvvəllər aşkar edilməmiş təhlükəsizlik boşluğundan istifadə edib. Bunun nəticəsində o, test mühitindən kənara çıxaraq internetə çıxış əldə etməyə müvəffəq olub. Daha sonra model lazım olan məlumatın "Hugging Face" platformasında yerləşdiyini müəyyən edib. Bildirilir ki, o, şirkətin istehsal mühitinə aid serverlərə icazəsiz giriş əldə edərək test üçün tələb olunan məlumatları çıxarıb.
OpenAI bu hadisəni qabaqcıl süni intellekt sistemlərinin yarada biləcəyi yeni kibertəhlükəsizlik risklərinin nümunəsi kimi qiymətləndirib.
