Yay aylarında kondisionerin tez-tez söndürülüb yenidən işə salınması cihazın istismar müddətini azalda bilər.
Metbuat.az xarici media-ya istinadən xəbər verir ki, kondisionerlərdə tətbiq olunan və "3 dəqiqə qaydası" kimi tanınan gözləmə müddəti kompressorun təhlükəsiz işləməsi üçün vacibdir.
Mütəxəssislər bildirirlər ki, cihaz söndürüldükdən dərhal sonra yenidən işə salındıqda kompressor daxilində yaranan təzyiq tam tarazlaşmadığından mühərrik əlavə yüklənməyə məruz qalır. Bu isə elektrik sərfiyyatının artmasına, sistemin həddindən artıq qızmasına və kompressorun vaxtından əvvəl sıradan çıxmasına səbəb ola bilər.
İstehsalçılar kondisionerin yenidən işə salınmasından əvvəl ən azı 3-5 dəqiqə gözləməyi tövsiyə edirlər. Bu müddət ərzində sistemdə təzyiq normallaşır və kompressor normal rejimdə fəaliyyətə başlayır.
Mütəxəssislərin sözlərinə görə, kondisionerin tez-tez açılıb-söndürülməsi yalnız mexaniki hissələrin aşınmasını sürətləndirmir, həm də cihazın səmərəliliyini azaldır. Belə hallarda otağın temperaturu aşağı düşsə də, havadakı rütubətin lazımi səviyyədə azaldılması çətinləşə bilər.
Bildirilir ki, ənənəvi kompressorlu kondisionerlərdən başqa, buxarlanma prinsipi ilə işləyən evaporativ soyuducular və istilik mənbəyindən istifadə edən absorbsion soyutma sistemləri də mövcuddur. Evaporativ qurğular daha az enerji sərf etsə də, əsasən quru iqlim şəraitində effektiv nəticə verir. Absorbsion sistemlər isə daha çox iri ticarət və sənaye obyektlərində tətbiq olunur.
Mütəxəssislər kondisionerin uzunömürlü və səmərəli işləməsi üçün istehsalçıların müəyyən etdiyi gözləmə intervalına riayət etməyi tövsiyə edirlər.
