Bakı, 22 aprel, AZƏRTAC
Aprelin 22-də “Qafqaz Baku City” otelində sağlamlıq turizmi ilə bağlı “Turbiznes” adlı seminar keçirilib. Azərbaycan Sağlamlıq və Termal Turizmə Dəstək İctimai Birliyi (AHTTSA) və Azərbaycan Turizm Assosiasiyasının birgə təşkilatçılığı ilə baş tutan seminarda sağlamlıq turizminin imkanları təqdim edilib.
Azərbaycan Sağlamlıq və Termal Turizmə Dəstək İctimai Birliyinin əməkdaşı Yuliya Konoplenko AZƏRTAC-a bildirib ki, seminarda Azərbaycanın 40-a yaxın turizm şirkəti iştirak edib. Onun sözlərinə görə, gün ərzində iştirakçılara Avstriyanın termal su mənbələri, Avropaya ekskursiya turları, ekzotik istiqamətlər, sağlıq turları barədə məlumat veriləcək, eyni zamanda Almaniyanın ən yaxşı hotelləri, Ştutqartın qonaqpərvərliyi, qədim tarixi mədəni abidələr, Kosta-Blanka sahillərində yerləşən məşhur turizm mərkəzi olan və “Avropanın turizm fenomeni” adını almış Benidorm haqqında təqdimat ediləcək.
Tədbirin təşkilatçısı, Rusiyada fəaliyyət göstərən “Turbiznes” təşkilatının əlaqələndiricisi Kristina Sivovanın sözlərinə görə, bu, təmsil etdiyi təşkilat tərəfindən Bakıda reallaşdırılan 5-ci tədbirdir. Təşkilatçı şirkətin nümayəndəsi qeyd edib ki, müxtəlif ölkələrin turizm şirkətlərinin və turoperatorlarının bir-biri ilə əlaqələrinin genişlənməsində bu tədbirin çox böyük əhəmiyyəti var. Tədbirdə Rusiya, İspaniya, Almaniya da daxil olmaqla, 6-ya yaxın ölkədən 10-dan artıq şirkət öz imkanlarını təqdim edir.
Azərbaycanın turizm imkanlarını yüksək qiymətləndirən qonaq ölkəmiz haqqında təəssüratlarını da bölüşüb: “Bu mənim Azərbaycana üçüncü səfərimdir. Hər dəfə Bakıya gələndə şəhərinizin daha da gözəlləşdiyinin şahidi oluram. Buradakı dostlarımın köməyi ilə müxtəlif məkanlara getmək imkanım olur. Etiraf edim ki, sizin turizm şirkətlərinə həsəd aparmaq olar. Çünki turistlərə təqdim etməyə o qədər gözəl yerlər, zəngin məlumatlar var ki, bunlarla istənilən insanı heyrətləndirmək mümkündür”.
Tədbirdə iştirak edən “OK Tours” turizm şirkətinin şöbə müdiri Ramiz Qafarov belə tədbirləri yüksək qiymətləndirib. Artıq beşinci dəfədir “Turbiznes” seminarında iştirak etdiklərini deyən şirkət nümayəndəsi qeyd edib ki, bir çox əlaqələri məhz bu tipli tədbirlər vasitəsilə qurublar. Onun sözlərinə görə, “OK Tours” eyni zamanda Rusiyanın Minvod vilayətində fəaliyyət göstərən turoperatorun Bakıdakı rəsmi nümayəndəliyidir.
O, deyib: “Azərbaycanlılar Minvoda çox səfər edirlər. İl ərzində təkcə bizim nümayəndəliyimiz vasitəsilə 2 min nəfərdən çox turist göndərilir. Onu da deyim ki, Azərbaycanın sağlamlıq mərkəzlərinə də Rusiya və keçmiş MDB məkanından gələnlər çoxdur. Xüsusilə Qazaxıstandan Naftalandakı sanatoriyalara hər il minlərlə insan gəlir”.
Seminar çərçivəsində iştirakçılar üçün ustad dərsləri də keçilib. Gün ərzində davam edən tədbirdə müxtəlif uduşlar oynanılıb.