Bakı, 22 aprel, AZƏRTAC
Azərbaycan Prezidenti İlham Əliyevin əlilliyi olan şəxslərə diqqət və qayğısının nəticəsi kimi, bu təbəqədən olan şəxslərin tibbi-sosial reabilitasiyası, habelə onların xaricdə bərpa-müalicəsinin təşkili işləri ilbəil güclənir. Xəbər verildiyi kimi, bu istiqamətdə işlərin davamı kimi, Əmək və Əhalinin Sosial Müdafiəsi Nazirliyi (ƏƏSMN) tərəfindən aprel ayının əvvəllərində 28 nəfərdən ibarət əlilliyi olan şəxs Türkiyənin Dənizli bölgəsində yerləşən “Nobel” Tibb Mərkəzinə bərpa-müalicəsinə yola salınıb.
Nazirlikdən AZƏRTAC-a bildiriblər ki, 20 günlük bərpa-müalicə kursunu başa vuran əlilliyi olan şəxslər bu gün artıq vətənə dönüblər. Onları Heydər Əliyev Beynəlxalq Hava Limanında ƏƏSMN-nin əməkdaşları və doğmaları qarşılayıb.
Əlilliyi olan insanlar bütün sahələrdə olduğu kimi, onların xaricdə bərpa-müalicəsinin təşkili işlərinə də möhtərəm Prezidentimiz tərəfindən daim diqqət və qayğı göstərilməsindən razılıqla söz açıblar. Onlar qardaş Türkiyədə onlara göstərilən reabilitasiya xidmətindən razılıqlarını bildiriblər.