Bu gün Respublikanın daxili işlər naziri, general-polkovnik Ramil Usubov ölkədə səfərdə olan Türkiyə Respublikası Silahlı Qüvvələrinin Tibb komandanı - Gülhanə Hərbi Tibb Akademiyasının rəisi, general-polkovnik Ömər Paçın rəhbərlik etdiyi nümayəndə heyəti ilə görüşüb.

Daxili İşlər Nazirliyindən ANS PRESS-ə verilən məlumata görə, qonağı səmimi salamlayan nazir müstəqillik illərində iki ölkə arasında qarşılıqlı dostluq və qardaşlıq münasibətlərinin bütün sahələrdə inkişaf edərək möhkəmləndiyini bildirib. Nazir bu əlaqələrin yaradılmasında ümummilli liderimiz Heydər Əliyevin müstəsna xidməti olduğunu vurğulayıb. R.Usubov Ulu öndərin "Bir milət, iki dövlət" siyəsətinin Azərbaycan Respublikasının Prezidenti cənab İlham Əliyev tərəfindən uğurla həyata keçirildiyini xatırladıb.

Dövlət başçılarının siyasi iradəsi və qarşılıqlı səfərlər nəticəsində ölkələrimiz arasındakı münasibətlərin keyfiyyətcə yeni mərhələyə qədəm qoyduğunu diqqətə çatdıran Ramil Usubov rəhbərlik etdiyi qurumun qardaş Türkiyənin hüquq-mühafizə orqanları ilə münasibətlərin daha da inkişaf etdirilməsinə böyük önəm verdiyini vurğulayıb. Nazir ordu quruculuğunda, o cümlədən DİN Daxili Qoşunlarının formalaşmasında, ən müasir tələblərə cavab verən silahlı birləşməyə çevrilməsində, şəxsi heyətin peşəkarlığının daha da yüksəldilməsində Türkiyə tərəfinin böyük zəhməti olduğunu bildirib. Nazir qardaş ölkənin ali hərbi məktəblərində və Polis Akademiyasında Daxili İşlər Nazirliyinin xəttilə 700-dən çox hərbi qulluqçu və müdavimin təhsil aldığını xüsusi qeyd edib. Buna görə minnətdarlığını bildirib.

O, Türkiyə Respublikası Silahlı Qüvvələrinin Tibb komandanı - Gülhanə Hərbi Tibb Akademiyasının rəisinin başçılıq etdiyi nümayəndə heyətinin bu səfərinin də əməkdaşlığın daha da genişlənməsinə təkan verəcəyinə əminliyini ifadə edib.

Səmimi qəbula, xoş sözlərə və ətraflı məlumata görə təşəkkür edən general-polkovnik Ömər Paç Azərbaycana səfərindən şərəf duyduğunu vurğulayıb. O, qısa zaman kəsiyində ölkəmizin olduqca sürətli və modern bir inkişaf yolu keçməsindən məmnunluğunu, ulu öndər Atatürkün “Azərbaycanın sevinci bizim sevincimiz, kədəri bizim kədərimizdir” fikrini xatırladıb. Ömər Paç, əlaqələrin bundan sonra daha da dərinləşməsinə çalışacaqlarını bildirib.
Mənbə
ANS PRESS