Bakı, 22 aprel, AZƏRTAC
“AtaTravel” MMC “Baku Travel Bazaar Wellness” tədbirində iştirak edib.
MMC-dən AZƏRTAC-a bildiriblər ki, tədbirə İsveçrə, Hindistan, Fransa, Maldiv adaları, Malayziya, Almaniya, İtaliya da daxil olmaqla, 15-ə yaxın ölkənin termal kurortları, SPA hotelləri və klinikaları da qatılıb.
“AtaTravel” MMC-nin baş direktoru Vüsal Əliyev bildirib ki, tədbirdə müxtəlif ölkələrdəki turizm şirkətləri, hotelləri və istirahət mərkəzlərinin yeni istiqamətləri ilə tanış olmaq üçün böyük imkanlar yaradılıb. “Baku Travel Bazaar”ın il ərzində bir neçə dəfə təşkili nəzərdə tutulub. “AtaTurizm” MMC sentyabr və oktyabr aylarında keçiriləcək “Baku Travel Bazaar Exotic” və “Baku Travel Bazaar Adventures” tədbirlərində də iştirak etməyi planlaşdırır.
"AtaTravel" MMC turizm agentliyi 2011-ci ildə təsis edilib və Azərbaycanın ən tanınmış holdinqlərdən biri olan, iqtisadiyyatın ayrı-ayrı sektorlarında böyük uğurlara imza atan "AtaHolding" Şirkətlər Qrupunun törəmə şirkətlərindən biridir. "AtaTravel" turizm agentliyi dünyanın istənilən nöqtəsinə səfərlər üzrə çoxsaylı xidmətlər təklif edir. Şirkət müştərilərə otellər, transferlər, aviabiletlərin, turların əvvəlcədən bronlaşdırılması, sığorta, viza xidmətləri, VIP-zal xidmətlərinin təmin edilməsi, avtomobillərin icarəsi, sağlamlaşdırıcı turizm və müxtəlif istirahət növləri üzrə xidmətlər göstərir.