Bakı, 22 aprel, AZƏRTAC
Belçikanın Avropa Şurası Nazirlər Komitəsində sədrliyi çərçivəsində krallığın Namür şəhərində aprelin 22-də Avropa Şurasının irs məsələləri üzrə məsul nazirlərinin konfransı işə başlayacaq.
Tədbirdə Azərbaycan Respublikası mədəniyyət və turizm nazirinin birinci müavini Vaqif Əliyevin rəhbərlik etdiyi nümayəndə heyətinin iştirakı nəzərdə tutulur.
Nazirlikdən AZƏRTAC-a bildirilib ki, aprelin 24-dək davam edəcək konfransın əsas məqsədi Avropa irs strategiyasının hazırlanması üzrə məsləhətləşmələrin aparılması, bununla bağlı müvafiq mövzular, prioritetlər və mexanizmlər üzrə qaydaların razılaşdırılmasıdır.
Qeyd edək ki, Belçika Krallığının Valoniya regionunun təşəbbüsü ilə keçirilən konfransda Avropa Şurasına üzv ölkələrin nazirlərinin iştirakı nəzərdə tutulmuşdur. Sayca 6-cı dəfə təşkil edilən konfransın yekununda Avropa irsinin qorunması və təşviqi üzrə deklarasiyanın qəbul edilməsi gözlənilir.